الرئيسية التسجيل مكتبي     البحث الأعضاء الرسائل الخاصة



   
العودة   ملتقيات أبناء اوربي > مكتبة أوربى الأدبية > منتدي النثر والقصص
 
منتدي النثر والقصص يشمل الخواطر الشعرية والنثرية والمواضيع القصصية


الاستغفار

يشمل الخواطر الشعرية والنثرية والمواضيع القصصية


 
   
   
أدوات الموضوع انواع عرض الموضوع
 
   
قديم 07-10-2018, 11:50 AM رقم المشاركة : 1
معلومات العضو

إحصائية العضو






نور الصباح is on a distinguished road

 

نور الصباح غير متواجد حالياً

 


المنتدى : منتدي النثر والقصص
افتراضي الاستغفار


السلام عليكم احكي ليكم الظروف الصعبه الانا مريت بيها وكيف انفرجت علي من اوسع الابواب وكل ما ابدا احكي ليكم القصه اقسم بالله العظيم الصور دي حقيقه وفي بيتي واتعمدت اظهر ليكم جزو من يدي والحمدلله الحمدلله ربنا ده ما بنقدر علي جزاهو
يلا انا كنت عايشه في الخليج مشيت ليها عروس وشفت عز ماشفتو في حياتي واهلي زاتم ضاقو معاي عز ياخ انا كنت لمن انزل اجازه الشنط البجيبا بتكون في بكاسي اتنين لكن المأساة بدت بعد ما فنشو ابونا وابا يرجعنا السودان علي امل انو حايلقى وظيفه جديده وحقوقو خلصت مصاريف وايجارات لمن عدمنا التعريفه حتي بعد داك عرفنا ان الله حق ولملمنا اطرافنا ورجعنا السودان بخفين حنين الا من بعض الدهيبات الكنت حصدتهم من غربتي وزوجي رفض يشيلم عشان يفك بيهم زنقتو في الخليج يلا لمن رجعنا مفنشين لقينا الناس غير الناس والاصحاب غير الاصحاب حتى اقرب الناس ليك متغيرين ومافي زول متذكر ليك ولاحتى لباس احيييي لمن اتذكر قلبي بوجعني شديييد يا بنات اصبرو لي ارووق واكمل ليكم في تعديل
#تعديل
نزلت عند اهلي ولقيت اختي الاصغر مني مسيطره علي البيت واهلي ما اتحملو اولادي وعبارات الزهج والاف بقولوها في وشي ولمن تحصل مشكله او اي حاجه بين اولادي واولاد اختي امي بتتحيز لي اولاد اختي مع انو زمان لمن نجي اجازه اولادي ديل بختوهم في الثريا وامي لو جات طالعه اي مكان لازم تسوقم معاها كنت بس بخس اشوف لي ركن فاضي في اي غرفه واقعد ابكي ابكي وماعاوزه زوجي يحس بأنو اهلي متضايقين منو ولا من اولادو ولمن خلاااص فاض بي سقت اولادي ومشيت قعدت عند نسابتي وقلت لي زوجي خلينا نغير شويه ونتونس مع اهلك ماحبيت افهمو ضيق اهلي مننا وعند نسابتي شفت ويل وكتاب بنفسجي ببساطه كنت كمن يستجير من الرمضاء بالنار وبكاي زاد وفكرت في اي طريقه تمرقني من الانا فيهو وسمعت نسيبتي بتشاكل في ولدا وبتقول ليهو نحنا فينا المكفينا شوف ليك طريقه اتخارج مالك من زمان ما سويت ليك بيت عشان اليوم الزي ده عملت نفسي ما سمعت اي حاجه والعصر كده سقت اولادي وودعت نسابتي بالبوس وانا قلبي معصووور رجعت بيت اهلي وقلت في نفسي نار الاهل ولا جنة النسابه وزوجي ما خلا مكان ما فتشو لي شغل
#تعديل
رجعت وقفاي يقمر عيش 😂
الغرفه البنوم فيها مع اولادي فيها 3سراير وانا اولادي اربعه انا وبتي بنوم في سرير واولادي الاتنين في سرير وبتي التانيه بتنوم مع ابوها وماتتخيلو كمية الحر والكتمه الاحنا عايشين فيها لانو ما عندنا طريقه في الحوش مليان فل يلا عندي بت خالتي كده حنينه معاي شديد اصلي مانسيت وقفاتا معاي كانت شغاله في شركه وامورا واضحه جابت لي مكيف والله قالت لي نزلناهو من غرفتناوغيرتو بي اسبلت شيلي ركبيهو في الغرفه عشان ما تنومو في الحر طرت من الفرح لكن يا فرحه ما تمت اختي جات غزت كوعا كده وقالت لي اسي المكيف ده انتي عندك ليهو حق كهربا 😏
للأسف زوجي سمعا وهي بتتكلم معاي ناداني جوه وقال لي ارجوووك ما تركبي المكيف وخلوني اشوف ليكم اي طريقه تتخارجو بقا يطلع ويجي بالليل ويلاقي الجوع بالجوع لو جبت ليهو كباية شاي ما بشربا وبقت عليهو جنس حاله تحنن وانا شويه شويه اصرف من الدهيبات واجيب حاجات تموينيه اختها في البيت عشان ما اتقل علي اهلي اكتر من كده ولمن الدهيبات كملن بقيت ابيع تيابي ولمن التياب كملن بقيت ابيع شنط السفر الفاضيه شنطه شنطه لي شنطة المكياج الزي شنطة الدايه ديك انا بعتها 😂
لمن المدارس خلاص فتحت ولدي الكبير كان نازل تامن والصغير ماشي الروضه كوولهم كبيتم في مدارس الحكومه والصغير بت خالتي الله يديها العافيه محل ما تقبل دفعت ليهو حق الروضه واشترت ليهم كراسات واقلام وشلت ملابس اولاد اختي والشنط ووديت الشنط خيتها وصلحتها وجبتها لاولادي 😔
زوجي لسه بطلع من الصباح يفتش شغل ويوم الصباح كده اولادي قبل ما يطلعو المدرسه مشيت اكب ليهم شاي وانا كنت معلمه الله ولي زمن ما اشتريت حاجه جبتها البيت وانا شايله صينية الشاي كده وماشه وامي بتعاااين اختي قالت لي انتي راجلك ده لمتين حا يأكل اولادو عرق الرجال انا راجلي طافح دمو وراجلك واولادك ماصين دمو وللاسف زوجي سمع اصلا شباك الاوضه فاتح وهم بتعمدو انو يسمع عاينت لي امي كده انتظرتها ترد اوتتطيب الخاطر بي كلمه لكن سكتت برضو دموعي نزلت ماعرفت ارمي الصينيه ولا اعمل شنو مشيت الاوضه لقيت زوجي طلع وولدي الكبير ببكي مسكتو وقعدنا نبكي واولادي الصغار شربو الشاي ماجايبين خبر 😂
ورجعت بي زكرياتي زمن الزمن زين لمن كنت اكون راجعه الخليج بعد ما الاجازه تخلص امي بتقول لي خلي دهبك هنا وخليك شاطره عشان راجلك يشتري ليك دهب تاني وانا املص الدهب واسافر ولمن ارجع اجازه تاني امي تقول لي اتصرفنا فيهو دفعنا لي اختك قروش الجامعه ومره تانيه برضو اتصرفو فيهو عشان يتمو عرس اختي وانا ما كنت متتضايقه وبقول الحمدلله انو انا خليت حاجه لقوها ساعة الشده
#تعديل
بعد المغرب كده زوجي رجع وشايل معاهو 20 جنيه قال لي اتعشو منها ودبري منها فطور المدرسه العشرين دي كانت بالنسبه لي زي العشرين مليار جبت منها زبادي وعيش للعشا وبيض لي حشوة بكره ولبن كدي شويه لي شاي بكره جينا فتينا الزبادي مع العيش واتعشينا مع اولادنا مبسوطيين بعد داك سألتو من اين لك هذا جبت العشرين من وين قال لي اشتغلت فرحت شديد طبعاً اها اشتغلت وين قال لي لقيت لي هايس عاوزين ليها سواق بس عشان ما عندي رخصه هسي اشتغلت فيها كده وناس المرور غرموني طلعت التوريده حقت صاحب العربيه وانا طلعت لي العشرين دي ولقيت ليكم غرفه ايجار بكره امشو شوفوها قلت ليهو بدون ما اشوفا يلا بكره نمشي فيها طوالي مشيت لقيتا في قطعه مسوره واسياد البيت خاتين سيخ كتير في الحوش وقالو اسيادو عايشين بره وحا يبدو البنا يوماً ما وللوقت داك يحلها رب العالمين البيت ناصيه في فسحه كبيره وغرفه ما معاها اي حاجه في حمام بلدي في ركن والغرفه في الركن التاني من بيت اهلي مسافة ركشه يلا طوالي شلت المكيف داك بعتو وجبت سراير مستعمله ومراتب وكم حاجه ضروريه كده منقد وحفاظة مويه وكنت مبسوووطه كأنه قصر حياة القصور عشتها زمان في الخليج الحمدلله حياتنا بدت بسيطه وبالنسبه للكتيرين ممكن تكون بائسه لكن كنا مبسوطين امي واختي جوني زياره قعدوا يبكو لمن شافو وضعنا يا حليلم واترجوني ارجع لكن كنت حاسه بي سعاده ما حسيتا هناك معاهم ابونا بطلع الصباح بدري ويسوق معاهو العيال علي المدارس وانا انضف كوخي ده زي ماقالو اولادي😂واعمل لي لقمه الجيران كانو ظراف بمدو لي التلج ولو عندي باقي شي بودي تلاجة الجيران وهكذا مشا الحال الى ان جاء يوم مشؤم زوجي عمل حادث وكسر الترقوه وبدت المعاناه من جديد وشلت هم الايجار والمصاريف تاااني😔
#تعديل
فكرت ارجع بيت اهلي تااني اولادي رفضو وزوجي رفض ومصر يطلع يشوف شغل بي حالتو دي يلا انا طوالي طلعت دبلتي من ايدي دي كنت باقيه عليها ما كنت عاوزه اصرفا لكن الله غالب مشيت جبت حاجات وجيت عملت سلطة اسود وطعميه وديتم الدكان اصلو المنطقه فيها مدارس وعمال ومتحركه سيد الدكان بقا يقول لي زيدي الكميه ماشاءالله القصه جابت رزق لكن برضو مابغطي كل مصاريف العيشه زوجي بقوم نص الليل يدعو ويبكي ويستغفر بقيت لمن اسمعو قام اقوم معاهو نصلي في جوف الليل ندعو ونلح في الدعاء وولدي الكبير زاتو بقا يقوم معانا ماشاءالله بقا في تانيه ثانوي وبقول لي نفسي ياامي اشيل بدلك التعب والمعاناه دي لكن ما عارف كيف لمن عيونو يلمعن بالدموع واقول ليهو انت بس انجح كده انا ما حا احس بالتعب وهو كان متفوق ماشاءالله اها مر زمن واصصلو ما خلينا قيام الليل والاستغفار ومره سيد الدكان قال لي في اولاد شهاده عربيه ساكنين بالشارع الورانا بشترو الطعميه والسلطه كل يوم وقالو اكلك نضيف وسمح طلبو مني اكلمك لو ممكن يجيبو ليك المواد والتموين وتعملي ليهم غدا كل يوم لمن يرجعو من جامعاتم يجو يشيلو ويدوك راتب شهري فرحت شديد وخلاص قلت ده الفرج جا قلت ليهو موافقه لكن يعفو لي بطلع صحن لي اولادي عشان ما اطبخ مرتين خلاص بديت الشغله دي كده ياهو فطور اولادي مارق من السلطه والطعميه وصحن غدانا مارق لكن ولدي زعلان ومتأثر من حكاية اني بطبخ لي ناس بالشهر لمن ببكي اقنعتو انو المهنه الشريفه ماعيب وعمر الشغل الشريف مهما كان وضيع ماببقا عار علي سيدو غايتو حسيت بي اقتنع وابونا بدا يتعافى شويه شويه في يوم كده جاني ولد من اولاد المنطقة زميل ولدي قال لي ولدك ليهو تلاته يوم ما جا المدرسه جيت اشوفو مالو انا راسي جاب وودا انهرت ووقعت مغشي علي
#تعديل
لمن فتحت بقيت ما بقدر اقوم وماحاسه برجولي ومابقدر اتحرك ولدي جا داخل وانا في الحال ده ابوهو قال لي ما تتكلمي معاهو ساقو طلعو بره وفهم منو الحاصل اتضح انو مشا اشتغل عتالي في مياه سوبا المعدنيه عندهم مستودع في منطقتنا يعتل البكتات من المستودع للعربيه وتاني يلفو يعتل من العربية للمحلات😔😔
قال عشان عاوز يساعدنا والشغل ماعيب انا انهرت زياده كيف ولدي يضيع مستقبلو وانا عايشه ومضحيه عشان مستقبل اولادي 😭
الدنيا ضاقت بي تاني وبقيت مابقدر اقوم وماعرفت السبب شنو والدكاتره ماعرفو السبب وانا ماخليت الاستغفار بقيت بالليل والنهار في كل الاوقات بستغفر وبقرا البقره وبفتحا في البيت علي مدار الساعه وزوجي ضاقت عليهو زياده لمن في يوم جاهو تلفون من واحد خليجي بعرفوكان شغال معاهو ضابط في الجيش هناك ونزل المعاش وجايي يستثمر في السودان وكانت علاقتو بزوجي زمان طيبه اها قال لزوجي اشتريت 120فدان في عطبره وعاوز استثمر في الزراعه ومابعرف زول اثق فيهو في السودان غيرك تخش معاي شريك انت بالاداره وانا بالارض وراس المال حا نزرع اعلاف وحا نصدر الخليج انا ما حا اقعد في السودان بمشي وبجي وانت في السودان الكل في الكل الحمدلله الحمدلله الحمدلله فرجت وسافر معاهو الصين جابو المعدات والجرارات والمحامي عمل عقد الشراكه والشغل بدا وجاب ليهو سياره دفع رباعي وبعد 3شهور بس جنوا ثمار المشروع والفلوس نزلت علينا زي المطر الحمدلله الحمدلله الحمدلله ومشينا بيت كويس ولسه مداومين علي الاستغفار قيام الليل وصلوات الشكر اها تاني جاتنا رزقه قرايب الزول ده واولاد عمو كان مستثمرين ورجال اعمال في السعوديه وبعد حادثة الوليد بن طلال قررو يتخارجو ويجو يستثمرو في السودان برضو نقلو شركاتم واموالهم هنا وبرضو زوجي شريك بي نسبه
وكان عندنا اصحابنا وجيراننا في الخليج سوريين جوا برضو عن طريق زوجي وفتحو مصانع فايبر وبرضو زوجي عندو نسبه وبقينا ما لامين في ابونا من كترة المسؤليات 😅
والبيت الفيهو الاوضه داك اشتريناهو وبنيناهو وفرشناهو من الصين وتركيا والفلوس بتخش بيتي كل يوم بالشولات لكن برضو انا كنت فاقده القدره علي المشي من زمن خلعة ولدي ديك كنت بباشر مسؤليات بيتي وانا جالسه ماخلو لي مكان ماسفروني ليهو ما عرفو السبب صحي القروش ما بتجيب العافيه وصحي العافيه من رب العالمين ومداومه علي الاستغفار واختي بقت لذيذه معاي شديد ولمن نمشي ناس امي عشان نقيل زوجي برسل قدامنا الخروف والضباح ولو ناس امي جونا برسل الخروف البيت طوالي وهو بكون في الشغل وبحترم اهلي شديد وبقول النسب عين شمس لكن ولدي ماقادر ينسا المواقف الزباله انا عن نفسي نسيت وسامحت مهما كان برضو ديل اهلي وما عندي غيرم وبديهم قبل مايطلبو وبرسل ليهم حاجات البيت من_وإلى كل شهر وبساعد اختي في دراسة اولادا
وهسي بعد ما جابو لي ناس الرقيه الشرعيه بديت اتحسن وامشي بالحديده المربعه بس دايره منكم تدعو لي يكمل لي الشفاء وامشي من غير حديده نسيت اقول ليكم بت خالتي عملت ليها عرسا في اكبر صاله وفرشت ليها بيتا هديه .وبوصيكم بالاستغار ثم الاستغفار وانا قدامكم اكبر دليل على فضل الاستغفار


hghsjythv







رد مع اقتباس
 
 

   
مواقع النشر
 

   
المواضيع المتشابهه
الموضوع كاتب الموضوع المنتدى مشاركات آخر مشاركة
سيد الاستغفار ابراهيم الحسين المنتدى الأسلامى 3 12-13-2016 05:42 PM
سيد الاستغفار أن تقول اللهم أنت ربي لا إله إلا أنت....... ابراهيم الحسين المنتدى الأسلامى 4 09-28-2016 05:35 PM
الاستغفار فى القرآن ابراهيم الحسين المنتدى الأسلامى 1 10-08-2014 04:33 AM
من قصص الاستغفار ابراهيم الحسين المنتدى الأسلامى 0 02-06-2013 03:36 PM
الاستغفار حسين تود المنتدى الأسلامى 0 01-23-2011 10:43 PM
 

   
يتصفح الموضوع حالياً : 7 (0 عضو و 7 ضيف)
 
 

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

flagcounter


Loading...


جميع المواضيع والمشاركات المطروحه تعبر عن وجهه نظر الكاتب ولا علاقه لملتقيات أوربى بها

Security team

  تصميم علاء الفاتك    http://www.moonsat/vb تصميم علاء الفاتك     http://www.moonsat.net/vb